الرئيسية / الاخبار / قصيدة من الشعر الشعبي للشاعر احسان العسكري

قصيدة من الشعر الشعبي للشاعر احسان العسكري

احسان العسكري  /////

 

 

 

قصيدة من الشعر الشعبي

احسان العسكري

عاشگ ..

وازف صبر العمر

بـگـلادة ايامي

الـغدت من فرگـتك

سـچـينة

تذبح ثواني مناطرك

چـن كل وريد يصيح

لي

چـاوينه ؟

دمي انفجر وعيون عذالي

ارتوت

وانت اعلى آخر

بسمه الك

دكَينا نيشان الصبر

ومن اهد آخر بسمه الك غنينا

والرازقي تلبس باصبعي

المس حرير اجفاك من طشينا

لم طيفك وطشه

بوجه صبحي هلا

جازي .. اشكثر طيشت لك

عمري وهواه وسنينه

انه ودليلي بلا نبض

ردلي العمر

واتذكر اشـچـم مره من مريت

شلنا ايامنا وطشينا ؟

وامشي  ..

ويجرني الشوگ الك

فراشة

ياقداح (ممنوع اللمس)

خاف انه اطير ويا الحلم …

 لم نومتك ..  تتطشر عيوني

نغم

غنى بصبر

عاشكَـ

هوى الياويل واهات ودمع …

لم بسمتك كَلبي

 اليرفرفلك ضوه …

سد عينك جفونك سرج خيال

ماشاله الغوه

وانت الحلم والطيف

 والخطار

وعيون الربع …

رد هوّد الليل..

 اشتهى كَلبي الشمع

واصبح

ووجه الليل يطوي مرايتي

يا آخر عيون الحوَت

شوگـي وهواي وغايتي ..

لم .. ليلك خيوط الفجر

ناغت صبر روحي وثرت

بوسه  اعلى وجهك .. طابعه عيوني ..

وچـنك ما شفت

رد لي الأخذته بمستحه

يا نور وجهي  الشاف بدر الليل

خايف .. واستحه

تنثر  والم حزن الوكت
وبوجه دنيا الماهو بيها
انت اطش
حزني ملبس والبخور
ايام عمري ..
الشالتك مثل الرمش
تذكر ندى ايامك
لمن هليت مره بطيفي
وتريد انسى وگـلبي
بيدك طيف ..
چـانه بكيفي ؟

عاشـگ .. وجان اسم الحزن

ما يندل دروبي ولازف بمسافة طيف

شوغاته الي

تضوي  اعلى خدك بسمتي

عاشـگتك.. وچــان العشـگ    ..

نجمة حزن

وتعلـگـت روحي بتوالي اجفاك

ترچــيه بــــإذن

احسان العسكري

 

عن ملف النور للادب الشعبي العدد الثالث

عن علي عبد الكريم

رئيس التحرير عضو نقابة الصحفيين العراقيين عضو نقابة الفنانين العراقيين
آخر الأخبار